काठमाडौँः त्रिशुलीमा गाडी दुर्घटना हुँदा पूर्व गृहमन्त्री माधवप्रसाद घिमिरेसहित उनका दुई भाइ बेपत्ता भएका छन् ।
पूर्वमन्त्री एवम् पूर्वमुख्य सचिव समेत रहेका घिमिरेसहित उनका भाइ मोहन र प्रकाश घिमिरे बेपत्ता भएको चितवका प्रमुख जिल्ला अधिकारी विनोदप्रका सिंहले जानकारी दिएका छन् ।
घिमिरेको परिवार चढेको गाडी दुर्घटनामा तीन जनाको मृत्यु भएको छ । घिमिरेकी आमा चैतन्य कुमारी घिमिरे, नारायण प्रसाद काफ्ले र सशस्त्र प्रहरीका सई रामचन्द्र कार्कीको मृत्यु भएको हो । गाडीका चालक घाइते विष्णु राईको भने भरतपुरमा उपचार भइराखेको छ ।
घिमिरे परिवारसहित मुक्तिनाथको दर्शन गरेर राजधानी फर्कदै थिए । घिमिरे चढेको बा ९ च १५१३ नम्बरको गाडी चितवनको दाह्रेचोक गाविस ३ को घोप्टेभिरबाट त्रिशुलीमा खसेको चितवन प्रहरीले जानकारी दिएको छ । बेपत्ताको खोजी कार्य भइरहेको प्रहरीले जानकारी दिएको छ ।
- अन्नपूर्ण अनलाइन
